جيت المكان اللّي بوسْطِه تربّيت

بيت قديم مْأسسيْنه مْن الطين

بأطراف ذاك البيت بالفكر سجّيت

ذكرت وقتٍ ماضٍ لي من سْنين

قمت أنثر العبره من الدمع هلّيت

ضيقه بصدري رافقت دمعة العين

تبقى بي الذكرى ولو رحت وأقفيت

أبكي على الأطلال لو ما بقى شين

باقي بك أشيا ذكّرتني وحنّيت

الزير وفْراشي وبعض المواعين

وأذكر سراجٍ كان يضوي لنا البيت

على سنا ضوّه نلف الميادين

يا كم ليله عشت فيكُ وْ تهنّيت

يا كم مضى لي بك من العسر واللّين

يا بيت ياللّي في خفوقٍ تعلّيت

لولا الظروف وقسوة الوقت هالحين

ما أنساك مهما غيرك اللّوم سوّيت

مهما ملكت مْن الفِلل والملايين..

شعر : منيرة الثابتي

ت