كتب بيت الاسبوع الماضي الشاعر رجا الرمال من الرياض والذي يقول :

كثرت مابين الناس كذب الاشاعات

واهدافهم يالربع ماهي نظيفه

وكانت الاصداء من الشعراء :

احذر يغرّك بالحكي كل شمّات

عن الكلام الكذب عينك كفيفه

خص الذي مس الوطن بالتلفات

الكذب واضح بالهروج السخيفه

أقمار كذبه كم تبث التفاهات

راع الردى والزور نفسه ضعيفه

عبدالكريم ابن خزيـّم - البكيرية

ناس تبيع وتشتري الكذب بالذات

تبي الفتن وهي لبليس الحليفه

هذاالوباء اللي منتشر وله علامات

يظهر على قلب حقود بزيفه

يسري مثل التيار ولامن سلامات

راعيه ناقص واللي يصدقه شيفه

صالح محمد محارب البشري

كثر الكذب من يوم جا به مساحات

ورسايل الجوال ماهي كليفه

أصبح من الجوال ينقل إشاعات

ويكتب مع التعليق كذبه وزيفه

وينشر مع الكذبه علوم التفاهات

مثل الزبد ينقل بسيله غريفه

سليمان بن عبدالعزيز السنيدي - الرياض

شاعت الفوضى في كل المجالات

والبعض منهم يعتبرها وظيفه

تراه شين ويذهب جميع الحسانات

ويسبب التظليل بالك تظيفه

خلك بعيد ولاتصدق كل المقالات

حتى تأكد من العلوم النظيفه

حمد عبدالله الوايلي - حوطة سدير

الفاسقين الله نصحهم با لايات

أهل العقول الطايحه والسخيفه

تبينوا من قبل سرد الحكايات

لاتظلمون اللي دروبه شريفه

ترك الذي ماهو يخصك عبادات

ان كان لك من ربنا الله خيفه

محمد عبدالله الشهري - مكة المكرمة

كثرة مروّجت العلوم الخبيثات

والقصد واضح للرجال الحصيفه

مجهولة المصدر وفقريّة إثبات

تديرها ايدين وعقولٍ مجيفه

شنواعلى الاجواد بالكذب حملات

وكم شوهوا صفحات بيضا عفيفه

عوض سلامه العنزي

غابتْ علومِ المرْجلَهْ والمرُوَّاتْ

عَنْ ناسِ لَفْعَالِ الدَّنَاءَهْ حَلِيفَه

اَعْمَارهم راحتْ بِخَلْقِ افتراءَات

واصْبَحْ لهمْ بَثِّ الضغاين وظيفه

منْ فعْلهُمْ ثَارتْ حرُوبِ وْعَدَاوَات

هَدَّوْ قصُورٍ بِالْمُوَدّهْ منِيفَه

ناصر جمعان آل عوض - وادي الدواسر

كثرت سوالف كذبهم والإشاعات

حتى غدت بين العرب مستضيفه

كم واحد ينثر كلامه بلا اثبات

لا همه المعروف ونفسه ضعيفه

والحر ما يتبع ردي كل الأصوات

نفسه على درب المراجل عفيفه

صالح بن إبراهيم السنيدي - الحرييق

بِهْ من كلام البعض ما لِهْ أساسات

فيه الكذب واهداف ما هي عفيفه

يا رجا طرحت بوضح عبارات

بث الاشاعه له نتايج كليفه

صك الإذن عن كل كذب او اشاعات

طبع العقول النيره والحصيفه

سعود عائش الحربي - جده

يمشون في هرج(ن) مع قيل ومتاهات

و تصدق الهرجة نفوس(ن) ضعيفة

كم فرقوا ما بين ربع وجماعات

و راحت ضحيتها قلوب(ن) نظيفة

المها عبدالسلام - الرياض

بيت الاسبوع

كتب بيت الاسبوع القادم الشاعر صالح محارب البشري من الرياض ويقول :

ياللي تصيف يم لندن وباريس

ترى مناطق مملكتنا جميله

نستقبل صدى هذا البيت بثلاث أبيات

خلال اربعة أيام من نشر البيت المطروح

على إيميل الصفحة:

[email protected]